Американскиот претседател Доналд Трамп донесе значаен пресврт во американската трговска политика, објавувајќи дека ќе му дозволи на технолошкиот гигант „Нвидија“ (Nvidia) да ги продава своите најнапредни чипови за вештачка интелигенција, моделот H200, на „одобрени клиенти“ во Кина.
Оваа одлука доаѓа по повеќе месеци геополитички тензии меѓу Вашингтон и Пекинг околу пристапот до клучни технологии.
Трамп ја објави одлуката на социјалните мрежи во понеделникот, објаснувајќи дека целта е да се заштити националната безбедност, да се создадат американски работни места и да се одржи американското лидерство во вештачката интелигенција.
Одлуката, која ќе важи и за други компании како АМД (AMD), следеше по интензивно лобирање од страна на извршниот директор на Nvidia, Јенсен Хуанг. Nvidia, која е највредната компанија во светот и водечки производител на чипови, беше во центарот на трговскиот спор и претходно ѝ беше забрането да продава најсовремена технологија во Кина.
Компанијата ја поздрави најавата на Трамп. Во изјава за Би-Би-Си Њуз, Nvidia истакна:
„Нудењето на H200 на одобрени комерцијални клиенти, проверени од Министерството за трговија, постигнува промислена рамнотежа што е одлична за Америка.“
Хуанг претходно предупреди дека Кина, која го развива сопствениот екосистем за чипови, ги достигнува САД во развојот на оваа технологија. Акциите на Nvidia бележат благ пораст по објавата.