Опозициската партија СДСМ преку прес-конференција на Наташа Поповиќ, членка на Извршниот одбор, побара итна политичка и институционална одговорност од министерот за здравство, Сашо Клековски, поради состојбата во Гостивар.
Од партијата соопштуваат дека здравствената криза во Гостивар е алармантна и дека над 2.000 граѓани веќе побарале лекарска помош поради симптоми на загадена вода за пиење.
Според СДСМ, надлежните институции задоцниле со реакцијата и дозволиле епидемијата на гастроентеритис да ескалира до сериозна здравствена криза.
Од опозицијата тврдат дека надзорот утврдил поставување на дивоградена пумпа во главниот цевковод, преку која директно се вбризгувала небезбедна вода од реката Вардар во водоводот.
Во партиското соопштение се нагласува дека епидемијата била прогласена дури кога амбулантите и болниците биле веќе преполни со заболени граѓани.
СДСМ упати директно обвинување до министерот Клековски дека свесно го одложил прогласувањето на епидемија со цел да ги скрие информациите за масовното труење.
Наместо брза реакција, следуваа празни изјави од типот „наскоро ќе има информации“, „за неколку дена ќе биде познато“ и „јавноста ќе дознае наскоро“, а потоа сите се преправаа дека се изненадени од размерите на катастрофата.
Поповиќ истакна дека криењето информации во услови на загрозување на јавното здравје претставува неодговорно постапување со сериозни последици.
На крајот од прес-конференцијата, од СДСМ побараа целосна вистина и итна одговорност од министерот за здравство и од сите раководители во надлежните институции.