Хрватската јавност е во шок по тешкото убиство што се случи утринава околу 8 часот во кафуле во градот Крапина. Жртва на нападот е Роберт Грилец (52), началник на криминалистичката полиција на Полициската управа Крапино-Загорје.
Според информациите од хрватските медиуми, началникот Грилец, кој во тој момент не бил на должност, бил застрелан од негов сосед, идентификуван како М.Г. (52). По смртоносниот напад врз полицаецот, сторителот излегол од локалот и се обидел да си го одземе животот со истото оружје. Тој е во тешка состојба и со хеликоптер итно е пренесен во Клиничката болница Дубрава во Загреб.
Полицијата официјално го потврди трагичниот инцидент:
„Утринава околу 8:10 часот во угостителски објект во Крапина, маж (1974) со огнено оружје пукал и убил полицаец (1974) кој не бил на должност, по што се пукал во себе со истото оружје. Со хеликоптер е пренесен во болницата Дубрава. Истрагата е во тек.“
Очевидците и вработените во кафулето опишуваат застрашувачки сцени. Напаѓачот влегол во локалот целосно молчешкум и, без никаква претходна расправа, испукал три куршуми кон Грилец пред очите на петнаесетина муштерии. Убиениот полицаец и напаѓачот живееле во непосредна близина во Крапина.
Хрватскиот портал „Индекс“ потсетува дека Роберт Грилец беше истакнат полициски службеник. Во 2018 година, тој беше одликуван од тогашната претседателка Колинда Грабар Китаровиќ за чесна и примерна служба.