Украинскиот претседател Володимир Зеленски изјави дека најтешките елементи од потенцијалниот мировен договор се прашањето за територијата, замрзнатите руски средства и безбедносните гаранции, но нагласи дека сега „повеќе од кога било“ постои шансa да се стави крај на војната.
На прес-конференција во Даблин со ирскиот премиер Мајкл Мартин, Зеленски откри дека разговарал со американскиот претставник Стив Виткоф, кој треба да се сретне со рускиот претседател Владимир Путин, и дека Украина ќе ги следи резултатите од таа средба.
„Ќе реагирам според тие резултати, ако почувствувам дека можеме да сметаме на вистински, конкретен дијалог… ќе се сретнеме“, изјави Зеленски.
Тој повтори дека замрзнатите руски средства треба да бидат искористени за украинската одбрана и за реконструкција, а Киев очекува цврсти безбедносни гаранции од САД и европските партнери.
Зеленски исто така откри дека бил подготвен нов мировен договор од 20 точки, кој претставува преработена верзија на претходниот американски предлог од 28 точки. Висок украински извор најави дека по разговорите во Москва е можен и состанок меѓу украинската делегација и американски претставници во Брисел