Министерството за надворешни работи и надворешна трговија (МНР) соопшти дека од денеска започнува процесот на евакуација на македонските државјани од Блискиот Исток. Акцијата ќе се спроведува со комерцијални чартер-летови, за што веќе е склучен договор со авиокомпанија по спроведена законска постапка.
Според утврдената динамика, се очекува до средината на следната недела да бидат евакуирани сите граѓани кои досега изразиле подготвеност за враќање во татковината.
Преглед на пријавените граѓани по региони:
Бројките покажуваат голем интерес за асистенција кај нашите државјани во неколку земји:
- Обединети Арапски Емирати (Абу Даби): Контактирани 585 лица.
- Катар (Доха): Контактирани 150 лица, од кои 95 веќе потврдиле евакуација.
- Кувајт: 36 лица.
- Бахреин: 15 лица.
- Саудиска Арабија: 5 лица.
„Завршувањето на постапката за јавна набавка претставува потврда за навременото и одговорно постапување во насока на заштита и грижа за македонските граѓани,“ велат од МНР.
Важен апел до граѓаните
Министерството упати уште еден јавен повик до сите македонски државјани кои сè уште не стапиле во контакт со нашите претставништва, а имаат потреба од помош, веднаш да го сторат тоа преку дежурните телефонски броеви на амбасадите или преку СОС-бројот на Министерството.
Техничките детали и точните сатници на летовите ќе бидат дополнително утврдени, а граѓаните ќе бидат навремено известени за секој чекор од нивното безбедно враќање.