Со преземање на првите количини тутун, Прилепскиот тутунски комбинат денеска официјално ја започна откупната кампања на годинашната реколта. Иако тутунарите се задоволни од првичната проценка на квалитетот, тие бараат повисока цена за да се обезбеди исплатливост на производството.
Тутунопроизводителот Благој Мицевски од Прилеп, кој годинава произвел околу 1.400 килограми, ја истакна потребата од корекција на цените.
„Добро оди проценката, но што се однесува до цените, реално треба да се зголемат, зашто се големи и трошоците. Првата класа треба да биде 600 денари за килограм. Тутун ќе садам и понатаму, тоа е егзистенција за моето семејство“, вели Мицевски.
Тутунскиот комбинат – Прилеп отвори 34 откупни пункта со 37 ваги низ земјава. Директорот, Александар Алексоски, изјави дека очекуваат интензивирање на откупот во наредните денови, а исплатата ќе се врши двапати неделно.
„Денешната динамика е како за прв ден, во помали размери, а очекуваме деновиве откупот да се интензивира. Имаме цени највисоки од сите откупувачи, 420 денари е за прва, 360 за втора и 300 денари за трета класа тутун. Доколку откупувачите и тутунарите се договорат за повисока цена, ние тоа може да го исплатиме и дури и ретроактивно“, изјави Алексоски.
Од Сојузот на земјоделски здруженија се задоволни од почетниот тек, но претседателот Кире Ристески порача дека не се откажуваат од барањето за повисока цена и будно ќе следат да се почитува законската забрана за увоз на ароматичен тутун додека трае домашниот откуп.
Годинашната реколта се проценува на квалитетна, со очекувани количини од 22.000 до 24.000 тони. Откупот ќе трае до крајот на февруари.