Мартин Гоџо од охридската населба Варош е најсреќниот меѓу стотиците верници кои денеска скокнаа во осветените води на Охридското Езеро. Тој успеа прв да стигне до чесниот крст на големиот празник Богојавление – Водици, продолжувајќи ја својата неверојатна низа на успеси.
За Гоџо ова не е прво вакво искуство. Тој веќе беше најбрз и во 2025 и во 2022 година, со што уште еднаш докажа дека среќата и верата се на негова страна.
Чинот на положување на крстот на градското пристаниште го изврши митрополитот на Дебарско-кичевската епархија, г. Георгиј, во присуство на илјадници граѓани и гости од земјава и странство. Овој традиционален настан и годинава го потврди статусот на Охрид како центар на празничното одбележување на Водици.