Американскиот претседател Доналд Трамп упати остри пораки до Техеран, нагласувајќи дека неговата администрација цели кон комплетна промена на владејачката структура во Иран. Како што објави „Ен-Би-Си Њуз“ (NBC News), овие коментари доаѓаат во период на ескалација на воените дејствија, непосредно по смртта на врховниот лидер Али Хамнеи минатиот викенд.
Во директно телефонско интервју за медиумот, Трамп беше дециден во своите намери: „Сакаме да влеземе и да исчистиме сè“, изјави тој. Претседателот откри дека веќе размислува за потенцијални фигури кои би можеле да го преземат раководството на земјата.
„Сакаме тие да имаат добар лидер. Имаме неколку луѓе за кои мислам дека би направиле одлична работа“, додаде Трамп, иако не откри конкретни имиња. Тој потврди дека се преземаат стратешки чекори за да се осигура безбедноста на неговите фаворити за време на конфликтот, кусо одговарајќи: „Да, ги набљудуваме“.
Трамп ги отфрли предупредувањата на иранскиот министер за надворешни работи, Абас Арагчи, за можна копнена инвазија од страна на САД и Израел, нарекувајќи ги таквите тврдења „залуден коментар“. Наместо инвазија, тој најави продолжување на воздушните напади со несмален интензитет.
„Тоа е губење време. Тие изгубија сè. Ја изгубија морнарицата. Тие изгубија сè што може да изгубат“, истакна американскиот претседател.
Додека Вашингтон прави планови за „нов Иран“, на терен ситуацијата останува неизвесна. Постојат шпекулации дека синот на Хамнеи, Моџтаба, би можел да го наследи татко си, додека аналитичарите предупредуваат дека Корпусот на исламската револуционерна гарда (ИРГЦ) е подготвен дополнително да го зацврсти своето влијание врз државата доколку успее да го преживее тековниот конфликт