Пратеникот на ВМРО-ДПМНЕ, Бране Петрушевски, денеска изнесе тешки обвинувања за работењето на претходната власт во ЕСМ Снабдување со топлина. Според него, кадри именувани од СДС и ДУИ се однесувале кон институцијата како кон приватна фирма, реализирајќи тендер вреден осум милиони евра кој завршил во однапред договорена компанија.
Петрушевски тврди дека во шемата бил вклучен Бујар Дардишта, кадар на ДУИ, а соработката резултирала со перење на два милиони евра преку мрежа од 33 лица.
„СДС и ДУИ да не молчат, туку да одговорат каде завршиле овие испрани два милиони евра? Дали парите завршиле во Мала Речица или на Бихаќка? Јавноста заслужува одговори, а Јавното обвинителство мора да си ја врши работата независно и одговорно“, изјави Петрушевски.