Во Скопје денеска ќе се одржи панел-дискусија на тема: „Од инциденти до системски ризици: Надворешните влијанија како тест за медиумската отпорност“, на која ќе биде презентиран документот за јавни политики „Медиумскиот екосистем и странското мешање и манипулирање со информации (СММИ)“.
Според соопштението на Институт за комуникациски студии, странското мешање и манипулирање со информации претставува сложен системски ризик за демократските општества, кој се појавува и се засилува преку медиумите. Овој феномен се остварува преку координирани активности на странски државни и недржавни актери, нивни посредници и усогласени канали, користејќи ја економската, институционалната и дигиталната ранливост на медиумите за влијание врз јавната дебата и довербата во институциите. Македонскиот медиумски екосистем не е имун на овие ризици, кои се поттикнати од институционални и системски слабости, што ги прави медиумите подложни на злоупотреби во координирани надворешни кампањи.
Авторите на документот, Марина Тунева и Драган Секуловски, ќе ги презентираат клучните наоди и препораките, додека претставници на медиумите ќе споделат искуства за онлајн напади врз комуникациските канали на редакциите.
Директорот на Агенција за аудио и аудиовизуелни медиумски услуги, Зоран Трајчевски, како и раководителката на секторот за сајбер безбедност во Министерството за дигитална трансформација, Тања Милановска Најдовски, ќе дадат осврти за тоа како овие предизвици се адресираат преку новите европски медиумски закони, меѓу кои Европскиот закон за слобода на медиумите (EMFA), Законот за дигитални услуги (DSA) и Европскиот закон за сајбер безбедност (EU Cyber Security Act).
Настанот го организира ИКС во рамки на проектот „Следење, откривање и разобличување на скриеното странско мешање и манипулирање со информации“, кој е поддржан од Британската амбасада во Скопје.