Битолската полиција стави крај на серијата измами во кои жртви беа повозрасни граѓани. Лишен од слобода е 40-годишниот В.П. од ресенското село Стење, кој живеел во Битола, а судија на претходна постапка веќе му одреди мерка притвор од осум дена.
Измамникот и неговиот соучесник (по кој сè уште се трага) користеле добро познато сценарио – телефонски повик до жртвите, лажно претставување како лекари и драматична вест дека близок роднина е тешко повреден и итно му требаат пари за операција.
На 5-ти февруари, тие измамиле 72-годишна битолчанка, која им предала златна огрлица и ланче вредни околу 40.000 денари. Уште подрзок грабеж се случил следниот ден, на 6-ти февруари. Измамниците убедиле 76-годишна жена и нејзиниот сопруг дека нивната внука е тешко повредена во Охрид. Исплашените пензионери се сретнале со измамникот кај Саат кулата во Битола и му предале дури 7.000 евра.
Полицијата извршила претреси на повеќе локации што ги користел осомничениот В.П., при што биле пронајдени парите и предметите што потекнуваат од измамите.