Украински суд донесе пресуда со која поранешниот претседател Виктор Јанукович е осуден во отсуство на 15 години затвор поради злоупотреба на државно земјиште, соопшти Специјализираното обвинителство за борба против корупцијата (САП).
Според пресудата, Јанукович е прогласен за виновен за проневера на шумска парцела со површина од 17,5 хектари во Киевската област, чија вредност се проценува на над 22 милиони гривни, односно повеќе од 500.000 долари.
Во периодот од 2009 до 2011 година, на спорната парцела бил изграден хотелски комплекс со ресторан, кој поранешниот претседател го користел за лични цели.
Кривичното дело, како што наведуваат надлежните институции, било сторено во 2007 година, кога Јанукович ја извршувал функцијата премиер на Украина.
Од САП информираат дека пресудата ќе стапи во сила во рок од 30 дена од нејзиното објавување, доколку во меѓувреме не биде поднесена жалба.