Социјалната мрежа X, поранешен Твитер, денеска беше недостапна за корисниците ширум светот поради, како што се чини, сериозен технички пад. Веб-страницата и мобилната апликација не се вчитуваа, а на многумина им се прикажуваше празен екран.
Дел од корисниците пријавија појава на страници со Cloudflare грешки, иако, според достапните информации, проблемот бил во самата платформа X, а не во Cloudflare, како што било случај за време на некои претходни прекини на услугата, објави британскиот весник The Independent. Во одредени претходни инциденти, страницата се вчитувала, но не прикажувала објави.
Податоците од сервисот Down Detector покажуваат дека околу 16 часот е регистриран нагол пораст на пријави за проблеми со функционирањето на X. Прекинот, според сè, бил глобален и се манифестирал и на веб-верзијата и на мобилните апликации.
За разлика од повеќето големи дигитални платформи, X нема јавно достапна страница за статус на услугите преку која корисниците би биле информирани за технички проблеми и прекини. Иако постои страница за статус на развојната платформа, за време на прекинот таму било наведено дека „сите системи се оперативни“.
Овој пад доаѓа само неколку дена по уште еден поголем технички проблем на платформата. Двата инцидента се случуваат во период кога X, која е во сопственост на Илон Маск, се соочува со засилени критики, како кон начинот на модерирање на содржините, така и кон нејзиниот чатбот Grok, поради создавање насилни и навредливи материјали, вклучително и слики со жени и деца.
Откако Маск во 2022 година го купи тогашниот Твитер, дел од корисниците и експертите изразија загриженост дека масовните отпуштања на вработени може да влијаат врз стабилноста и безбедноста на платформата. Иако X во најголем дел остана функционална, мрежата и понатаму повремено се соочува со технички проблеми, објави Скопје1.мк.