Откажани десетици летови на аеродромот во Лондон поради Ковид-19

Лондонскиот аеродром Гетвик ќе откаже околу 82 полетувања оваа недела поради недостаток на персонал во кулата за контрола на летање поради боледувања и коронавирус.

Шефот на аеродромот Стјуарт Вингејт рече дека е „многу фрустриран“ од серијата проблеми со контролата на воздушниот сообраќај на аеродромот. Околу 30 отсто од персоналот на контролата на летање е недостапен, рече тој.

Најголем број откажувања ќе има во петок на 29 септември кога ќе бидат засегнати 33 поаѓања. Недостигот од кадар се очекува да влијае на вкупно 3 проценти од сообраќајот, јавува Би-Би-Си.

Тие додаваат дека летовите ќе бидат пропорционално откажани меѓу авиокомпаниите. ЕasyJet ќе биде најпогоден, со BA и Ryanair, исто така, меѓу оние кои се замолени да откажат летови.

Јохан Лундгрен, главен извршен директор на EasyJet, рече дека е „за жалење што е потребно привремено ограничување на капацитетот на аеродромот Гетвик“.

Сепак, тој рече дека тоа е „правилно дејство на аеродромот за да може да се избегнат откажувања и одложувања во текот на денот“.

Да потсетиме, ова е трет проблем на лондонските аеродроми за помалку од еден месец. На крајот на август беа откажани 500 летови токму поради техничка грешка.

Пред десетина дена беа откажани и летови поради недостиг на контролори на летање.