Премиерот на Унгарија, Виктор Орбан, денеска изјави дека земјата нема да го спроведе пактот за миграција на Европската Унија „сè додека има национална, патриотска Влада“.
„Брисел издаде наредба. Миграцискиот пакт се активира. Би сакал еднаш засекогаш да бидам јасен: сè додека Унгарија има патриотска Влада, нема да го примениме пактот за миграција“, рече Орбан во видео порака објавена на Фејсбук, пренесе унгарската новинска агенција МТИ.
Тој додаде дека Унгарија нема да прифати мигранти и нема да им додели ниту еден евро на миграционите програми.
Пактот за миграција и азил е збир правила на Европската Унија, чија примена треба да започне од јуни 2026 година. Целта на пактот е да се воспостават ефикасни и унифицирани процедури за управување со пристигнувањата, да се обезбеди праведна распределба на товарот меѓу земјите членки и да се унапреди солидарноста, додека се заштитуваат основните права на мигрантите.