Собранието на Република Северна Македонија денеска ќе ја одржи првата пленарна седница по завршувањето на Локалните избори. Пред почетокот на 70. седница, премиерот и министрите два часа ќе одговараат на прашања од опозициските пратеници.
На предлог на дневниот ред на 70. седница се:
- Верификација на мандат на пратеници.
- Предлог за именување на член на Фискалниот совет.
- Избор на членови на Националниот совет за високо образование и научно-истражувачка дејност (две точки).
- Предлог за избор на член на Државниот совет за превенција на детско престапништво и правда за децата.
- Предлог на закон за ратификација на Спогодбата со Владата на Република Азербејџан за ослободување од визи на носителите на дипломатски и службени пасоши.
- Предлог на закон за ратификација на измените и дополнувањата на Конвенцијата за заедничка транзитна постапка.
Во прво читање на седницата ќе бидат разгледани измените и дополнувањата на следниве закони:
- Законот за правата на заедниците кои се помалку од 20 проценти од населението.
- Законот за аудио и аудиовизуелни медиумски услуги.
- Законот за данокот на додадена вредност.
- Законот за гранична контрола.
- Предлог на закон за претворање на побарувањата на РСМ по основ на јавни давачки во траен влог во ЈП за стопанисување со спортските објекти.
По завршувањето на 70. седница, Собранието треба да одржи и продолжение на 19. седница, каде преостанати точки се Финансискиот план на Агенцијата за супервизија на капитално финансирано пензиско осигурување за 2025 година и Предлог одлуката за висината на месечниот надомест што го наплатува Агенцијата од пензиските друштва за 2025 година.