Поранешната светска број 2 во тенисот, Онс Џабер, објави дека очекува машко бебе, кое треба да се роди во април следната година.
Тунижанката, трикратна грен слем финалистка, радосната вест ја сподели на социјалните мрежи, придружена со фотографија на која позира со сопругот Карим Камун.
„Теренот ќе мора да почека на подолг период – наскоро ќе го пречекаме новиот мал соиграч. Бебето ќе му се приклучи на тимот во април,“ напиша 31-годишната Џабер.
Џабер беше финалистка на Вимблдон во 2022 и 2023 година и на УС Опен во 2022, но последните две години се соочуваше со повреди кои ја оддалечија од врвот.
Во моментов е рангирана на 79. место на ВТА листата, а со бременоста нејзиното враќање на терените ќе мора да почека.