Членот на Извршниот одбор на СДСМ, Петар Огњеновиќ, денеска на прес-конференција упати сериозни обвинувања до министерот Панче Тошковски и МВР за користење на шпионскиот софтвер „Пегазус“. Според партијата, овој систем овозможува целосен пристап до камерите, микрофоните и пораките на телефоните на сите граѓани во државата.
Од СДСМ велат дека „Пегазус“ е развиен од израелската компанија NSO Group и служи за таен надзор, а во светот често се злоупотребува против критичари на властите.
„После Black Cube, приватниот Мосад, за тајно снимање, следење и фабрикување афери Мицкоски и ВМРО-OKG одат чекор понатаму: воведуваат државен шпионски софтвер против сопствените граѓани. Мицкоски сега го копира тој авторитарен модел. После Орбановите медиуми, после Black Cube, сега доаѓа Pegasus, тотална контрола над граѓаните, а пред сè над СДСМ и претседателот Венко Филипче“, изјави Огњеновиќ.
Партијата тврди дека ваквата практика е директно кршење на Уставот и Европската конвенција за човекови права, нагласувајќи дека МВР наместо да ги штити, ги шпионира граѓаните.
СДСМ упати три клучни барања до власта:
- Веднаш да се обелодени кој го купил Pegasus, колку чини и против кого се користи.
- Независна истрага за злоупотребата на софтверот од страна на МВР.
- Оставка од Панче Тошковски.
„Демократијата не е компатибилна со Pegasus. Граѓаните на Македонија заслужуваат слобода, а не шпионирање 24 часа на ден“, порачаа од СДСМ.