Вишото јавно обвинителство во Зајечар повторно го достави обвинението против Дејан Драгиевиќ и Срѓан Јанковиќ за тешкото убиство на двегодишната Данка Илиќ. Ова се случува откако судот претходно го врати предметот на доработка за „подобро разјаснување на состојбата“.
Иако телото на малото девојче сè уште не е пронајдено, обвинителството е децидно дека собраните докази се доволни за судски процес. Осомничените се товарат дека на 26 март 2024 година ја удриле Данка со службено возило, по што наместо помош, ја усмртиле и ја фрлиле на депонија.
Во случајот е опфатен и Радослав Драгиевиќ, таткото на еден од осомничените, кој се товари за помагање и непријавување на делото. Доколку судот го потврди обвинението и се докаже нивната вина, на сторителите им се заканува казна доживотен затвор.