Стојанче Јовановски денеска пред судот ја даде својата верзија за настаните кои претходеа на кобниот 2 март 2026, кога неговата сопруга Ивана и шестгодишната ќерка Катја ги загубија животите по падот од шести кат. Тој се соочува со обвиненија за загрозување на сигурноста и помагање во самоубиство.
Во својот исказ, Јовановски тврдеше дека брачните проблеми започнале во 2022 година по откривање на пораки од колега. Тој опиша драматичен инцидент од август 2025 година, кога неговата сопруга наводно со детето во раце бегала по автопатот од Штип кон Скопје по расправија за нејзиниот телефон.
Обвинетиот раскажа дека на денот на трагедијата ја видел сопругата како излегува од возилото на Мартин Саздов, по што изреволтиран замавнал кон неа. По неколку полициски интервенции и тензични средби, тој се нашол пред зградата кога го слушнал кобниот звук.
„Слушнав силен тресок. Мартин почна да вика ‘Ивана паднала’. Кога го слушнав тоа се вознемирив и излегов на улица, се фрлив пред кола. Потоа се јавив во брза помош со надеж дека се живи“, рече Јовановски.