По спроведена истражна постапка, Основното јавно обвинителство Скопје поднесе обвинителен акт против две лица, кои се товарат дека како соизвршители сториле кривично дело – загрозување на животната средина и природата со отпад, по член 230 став 1 во врска со член 22 од Кривичниот законик.
Според обвинителството, во текот на октомври годинава, обвинетите со пропуштање на вршење надзор над собирањето, транспортот и управувањето со отпадот, создале ризик од значително оштетување на квалитетот на почвата, воздухот и водата, како и опасност за животот и здравјето на луѓето и уништување на растителниот и животинскиот свет во поголеми размери.
Првиот обвинет, вршител на должноста директор на ЈП „Комунална хигиена“ Скопје, постапувал спротивно на Статутот на претпријатието и на Законот за комунални дејности, не ги спроведувал одлуките и заклучоците на Управниот одбор и не обезбедил соодветни мерки за заштита на животната средина. Како давател на комунални услуги, не ја извршувал дејноста континуирано и квалитетно, ниту се грижел за функционалноста и исправноста на опремата и објектите.
Заедно со вториот обвинет, управител за отпад – подгрупа 5, кој имал положен стручен испит за управување со отпад, со умисла постапувале спротивно на Законот за животна средина и Законот за управување со отпад, не преземајќи мерки и активности за спроведување на плановите и програмите за управување со комуналниот отпад на подрачјето на Град Скопје.
Обвинителството наведува дека поради нередовно собирање и транспортирање на отпадот и непобарана измена на оперативните планови, било овозможено создавање диви депонии на јавни и сообраќајни површини, со одлагање отпад во непосредна близина на садовите за собирање.
Со оглед дека доказната постапка е завршена и дека обвинетите повеќе не можат да влијаат на истрагата, јавниот обвинител предложи мерката притвор да им биде заменета со мерки на претпазливост – забрана за напуштање на живеалиштето, обврска за повремено јавување во судот и привремено одземање на патните исправи. За обвинетиот управител со отпад, кој сè уште е вработен во претпријатието, е предложена и дополнителна мерка – привремено отстранување од работното место и забрана за вршење работни активности поврзани со делото.
Осомничените Сабахудин Рустеми и Аки Саити беа приведени кон крајот на октомври.