„„Го наследив хаосот, сега ја водам Америка кон победа“ – нагласи Трамп во годишното обраќање по првата година од неговиот мандат, не пропуштајќи да го искритикува својот претходник Бајден, поставувајќи ја главната рамка дека проблемите пред кои е исправена земјата не се негова одговорност. Во 20-минутниот говор се пофали дека постигнал повеќе отколку што некој можел да замисли. Зборуваше за економските успеси на неговата администрација, како и за напорите за запирање на протокот на нелегална миграција.
„Пред 11 месеци наследив хаос, сега го чистам. Кога ја презедов функцијата, инфлацијата беше најлоша во последните 48 години. Ова се случи за време на администрацијата на демократите. По само една година, постигнавме повеќе отколку што некој можеше да замисли. Во изминатите 7 месеци, на ниту еден нелегален странец не му е дозволен влез во нашата земја. За само неколку месеци, преминавме од најлошото кон најдоброто. По години рекордно опаѓање на приходите, нашите политики ги зголемуваат нето платите со историско темпо. Веќе обезбедив рекордни 18 трилиони долари инвестиции, голем дел постигнат со царини. Пред една година нашата земја беше мртва, подготвена да пропадне, но сега сме најсилната земја во светот“, изјави Доналд Трамп, претседател на САД.
Нови политики не беа конкретно претставени, освен најавите за поагресивни мерки за домување, именување нов претседател на Федералните резерви и исплата на бонуси од 1.776 долари за американските војници.
„Поради царините вечерва сум горд што објавувам дека повеќе од милион и 450 илјади припадници на воената служба ќе добијат посебна дивиденда пред Божиќ, на секој војник му испраќаме 1.776 долари. Заработивме многу повеќе пари отколку што некој мислеше поради царините, а законот ни помогна. Каква разлика прави една година. Ќе добиете многу подобра здравствена заштита по многу пониска цена. Единствените губитници ќе бидат осигурителните компании кои се збогатија и Демократската партија, која е целосно контролирана од истите тие осигурителни компании“, нагласи Доналд Трамп, претседател на САД.
Трамп не заборави да ја истакне и својата мировна улога, нагласувајќи дека во изминатата година успеал да стави крај на осум војни. И покрај претставениот успех, популарноста на Трамп меѓу Американците опаѓа. Јавноста е загрижена за трошоците за живот додека Републиканската партија се соочуваа со неизвесни избори за Конгресот во наредната година.