Асоцијацијата на превозници „Макам-транс“ упати важно известување до своите членки и до сите возачи дека Грција воведува нови, построги правила за задолжителната опрема во возилата кои стапуваат на сила од 18 јуни 2026 година.
Според новите прописи, сите возила кои влегуваат во Грција мора да носат нов, пообемен комплет за прва помош кој содржи 16 специфични предмети.
Меѓу новите задолжителни елементи во кутијата се наоѓаат специјализирано изотермално спасувачко ќебе, како и посебни облоги за изгореници.
Од асоцијацијата потенцираат дека сопствениците или возачите на возилата, поради посебните услови за одржување, имаат одговорност редовно да ја проверуваат валидноста на секој предмет во кутијата и навремено да ги обновуваат, особено во летниот период.
Дополнително, медицинските и фармацевтските материјали кои се наоѓаат во комплетот мора да бидат во рамките на рокот на траење, да бидат во добра состојба и задолжително да ја поседуваат ознаката (CE), во согласност со Регулативата на ЕУ за медицински помагала.
Патните контроли во Грција строго ќе го проверуваат поседувањето на оваа опрема. Доколку при контрола се констатира дека возилото го нема потребниот нов комплет за прва помош, сообраќајната полиција ќе изрекува парична казна во износ од 30 евра.