Следната недела започнува првата реконструкција на аеродромот „Свети Апостол Павле“ во Охрид, по неговата изградба, најави вицепремиерот и министер за транспорт, Александар Николоски.
Според него, претходно беа преземени активности за легализирање на аеродромот, што беше сложен процес.
-„Реконструкцијата ќе биде прва од тој тип од неговото градење. До неодамна аеродромот беше нелегален објект – постоеше физички, но не и на хартија. Успеавме да го легализираме, што е важно за државата. Сега следува реконструкцијата која ќе донесе повеќе летови и патници. Очекувам туристичкиот сообраќај да се насочи кон Охрид, а бизнис летовите кон Скопје“, изјави Николоски во поткастот на ТВ Сител, соопшти Министерството за транспорт.
Тој потсетува дека се работи на договор за авиосообраќај со Саудиска Арабија, со цел воспоставување директна линија меѓу двете земји:
-„Веќе имаме протокол за договор и очекуваме во следниот месец да го преговараме, потпишеме и да имаме директен лет од Саудиска Арабија до Скопје. Авиосообраќајот значително се развива во изминатата година и половина, со воспоставени 23 нови дестинации од домашните аеродроми“, додаде Николоски.