Министерството за енергетика, рударство и минерални суровини (МЕРМС) денеска ќе ги презентира следните активности за заштита, сертификација и промоција на македонскиот рубин.
На јавноста ќе ѝ бидат претставени досегашните резултати, како и планираните чекори за воспоставување целосен систем за заштита и препознатливост на македонскиот рубин – од утврдување и документирање на неговото потекло, преку сертификација и дефинирање јасни критериуми, до воспоставување механизми за негова автентична промоција.
Посебен акцент ќе биде ставен на активностите за меѓународна промоција на македонскиот рубин, со цел негово поголемо препознавање надвор од земјата.
Од Министерството најавуваат дека на настанот јавноста и медиумите ќе имаат можност директно да се информираат за досега преземените активности, следните чекори и начинот на кој ќе се одвива процесот во наредниот период.
На презентацијата ќе присуствуваат министерката за енергетика, рударство и минерални суровини Сања Божиновска, членовите на новоформираната Комисија за македонскиот рубин, како и претставници на Геолошкиот завод, Заводот за индустриска сопственост, Министерството и други институции и чинители вклучени во процесот.
Божиновска во јуни годинава соопшти дека е донесено решение со кое официјално се заштитува македонскиот рубин како македонски полускапоцен камен.
Македонскиот рубин е корунд со карактеристична малиново-розова боја, која се должи на присуството на хром во неговата кристална структура. Според наведените податоци, се наоѓа во околината на Прилеп и во планинскиот регион на Мариово.
Покрај естетската и колекционерската вредност, рубинот се претставува и како дел од природното, културното и историското наследство на земјата.
Активностите за заштита на македонскиот рубин започнаа во септември 2025 година.