Од полноќ во Македонија на сила се новите цени на бензинот и дизелот. Според последната одлука на РКЕ, цената на дизелот се зголеми за 1 денар по литар и од полноќ се продава за 99,5 денари. Бензините поевтинија за 2 денари и тие од полноќ се точат за 91, односно 93 денари за литар.
Во вчерашната одлука на РКЕ применет е намален износ на акцизата од 2,00 ден/лит кај бензините ЕУРОСУПЕР БС-95 и ЕУРОСУПЕР БС-98 и намален износ на акцизата од 4,00 ден/лит кај ЕУРОДИЗЕЛ (Д-Е V).
Во моментов дизелот има највисока цена во последните 3,5 години. Последен пат поскап дизел сме имале на почетокот на ноември 2022та додека неговата највисока цена во историјата е регистрирана пред 4 години кога се продаваше и за 111 денари по литар.
Во истиот период најскапо се продаваше и бензинот кој тогаш се точеше за 110 денари.
Владата за оваа недела најави нова анализа на цените по што ќе се носи одлука за евентуално воведување на мерки.