Нова трагедија: Во тешка сообраќајка загина 19-годишно момче

Деветнаесетгодишно момче од селото Миравци го загуби животот во раните утрински часови денеска, откако автомобилот „БМВ“ што го управувал излетал од коловозот на регионалниот пат меѓу селата Миравци и Давидово, информираа од Секторот за внатрешни работи – Струмица.

Несреќата се случила околу четири часот наутро, а според информациите, момчето починало на самото место. Смртта ја констатирал лекар од Итната медицинска помош кој пристигнал на терен.

Увид на местото на настанот извршиле јавен обвинител и увидна екипа од ОВР – Гевгелија. По наредба на обвинителството, телото на починатиот е предадено на обдукција.

Ова е уште една трагедија која ја потсетува јавноста на потребата од зголемена внимателност и одговорност во сообраќајот, особено на регионалните патишта кои често се ризични поради својата инфраструктура и брзината на возење.

Министерот за внатрешни работи, Панче Тошковски денес на прес конференција од Охрид кажа дека бројот на жртви во сообраќајот во земјава е на исто ниво како и минатата година, но рече дека доколку се споредат бројките со тие во европските земји тогаш ситуацијата е катастрофална.