33-годишен маж е ликвидиран доцна синоќа во познатата населба Белград на вода. Станува збор за Црногорецот Филип Ивановиќ, родум од Цетиње.
Застрелан бил со куршум во челото од страна на 21-годишно момче. Како што јавуваат српските медиуми, убиецот е пронајден. Се работи за извесен Ѓ.З. кај кого биле пронајдени два пиштола, но и словенечки документи за кои се верува дека се фалсификувани.
По Ивановиќ трагал Интерпол. За него била распишана меѓународна потерница откако на 4 декември минатата година побегнал од куќен притвор во Белград.
Во Србија против него се водел судски процес поради помагање на Лазар Тејиќ по убиството на Бојан Мирковиќ, додека Црна Гора го барала под сомнение дека бил член на организирана криминална група и соизвршител во неколку тешки убиства.
Од Управата на полицијата на Црна Гора соопштиле дека Генералниот секретаријат на Интерпол во Лион објавил меѓународна потерница по Ивановиќ и дека неговото екстрадирање во Црна Гора било планирано по завршување на судскиот процес во Србија.
Ивановиќ претходно бил уапсен во Белград на 25 ноември 2020 година под сомнение дека учествувал во тешко убиство. По бегството од куќниот притвор, повеќе од девет месеци бил во бегство, сè до неговото убиство синоќа.
Осомничениот, Ѓ.З. (21), бил пресретнат од полицајци во цивилна облека на само 200 метри од местото на злосторството, каде што бил разоружан и уапсен.
На осомничениот му е одреден притвор од 48 часа, а во тек е истрага, по што ќе бидат познати повеќе детали.
Итната медицинска помош потврди за РТС дека човекот е убиен и дека пукањето се случило во 23:13 часот.