Груевски: Ќе се реализираат три клучни проекти од програмата за Катастарот

Македонскиот премиер Никола Груевски денеска најави три суштински измени на Законот за катастар.

Првата измена е можност за бесплатна изработка на елаборати за легализација на дивоградби за околу 40.000 лица приматели на социјална помош и постојана парична помош. Тие ќе имаат можност своите дивоградби да ги легализираат без да го платат трошокот за елаборатот.

Втората значајна измена е воведување регистар на цени на пазарот на недвижности. Во него, како што појасни премиерот Груевски,  ќе се внесуваат сите цени на сите продадени недвижности во Република Македонија.

- Тие ќе бидат ориентир на компаниите и граѓаните за движењето на цените во таа област, кои ќе бидат достапни електронски за да може секој да ги види, истакна Груевски во своето обраќање пред велешани.

Третата клучна измена на Законот за катастар е создавањето електронски шалтер на Катастарот, кој, како што рече премиерот, ќе им помогне на граѓаните да ги соберат потребните податоци.

- Досега имаше електронско поврзување на Катастарот со нотарите, а отсега ќе има и со судовите, обвинителите и со матичната евиденција, како и со поголем број други институции во државата кои имаат потреба од катастарски податоци. Така што, Катастарот и огромен број институции, ќе бидат електронски поврзани. Услугите од Катастарот ќе се користат по електронски пат што значително ќе ја забрза работата во услужувањето на граѓаните, појасни Груевски.