Почнува судскиот процес Груевски - Заев

Македонскиот премиер Никола Груевски и претседателот на опозициската СДСМ, Зоран Заев денеска треба да се сретнат во судница – стартува судскиот спор во кој Груевски од Заев бара отштета од половина милион евра за претрпена душевна болка, предизвикана од обвинувањето дека при продажбата на „Македонска банка“ посредувал и побарал 1,5 милиони евра.

Тужбата следуваше по прес-конференцијата на лидерот на СДСМ, Зоран Заев, на која тој го обвини Груевски дека при продажбата на „Македонска банка“ земал 1,5 милиони евра во кеш од српскиот тајкун Јовица Стефановиќ – Нини. Доказите со кои располагаше опозицијата беа доставени до Јавното обвинителство, кое се уште работи на расветлување на случајот.