Мистериозното момче кое беше пронајдено издрогирано се врати во Чешка

Триесет и шестгодишниот Чех, мистериозното момче за кое норвешката полиција побара помош за идентификација откако без документи, со амнезија и наводни повреди беше пронајдено во Осло минатата година, се наоѓа во својата татковина Чешка.

Ова го објавија медиумите, повикувајќи се на норвешка телевизија која добила потврда по електронска пошта од лицето кое засега се „крие" под името Џон Смит.

Тој планирал само да извади нови документи дома и повторно да отпатува поради страв од непознати напаѓачи и тврди дека во Чешка постои кампања против него и негира дека се преправа дека го изгубил помнењето заради претходни долгови.

Претходно, младиот маж на норвешките медиуми им тврдеше дека во минатото работел за чешката полиција и соработувал во истрага на стопански криминал.

Чешкото Министерство за внатрешни работи информираше дека лицето никогаш не било вработено со овластувања во полицијата, туку само како компјутерски техничар.

Идентификацијата на 36-годишниот човек беше извршена од неговото семејство, (потврдено и со ДНК- анализа) по објавата на норвешката полиција дека е пронајден без документација, а со амнезија за своето минато.

Според норвешката полиција лицето било жртва на кривично дело и води истрага за случајот.