Во општина Битола регуларно отворени сите 170 избирачки места

Во општина Битола утрово во 7 часот почна изборниот процес за денешниот втор круг од претседателските избори и за предвремените парламентарни избори.
 
Од Општинската изборна комисија (ОИК) информираат дека изборите се реализираат на 170 избирачки места каде граѓаните одлучуваат за кандидатите за претседател на државата и за 14 листи со кандидати за пратеници од изборната единица број 5.
 
- За вториот круг од изборите за претседател на Република Македонија, според единствениот избирачки список право на глас имаат 82.588 лица, додека во изборот на идни пратеници во Собранието на Република Македонија учествуваат 82.211 лица. Овие податоци се различни затоа што затворањето на Единствениот избирачки список беше направено во различно време, изјави Зоран Насев, претседател на ОИК-Битола.
 
Во текот на вчерашниот ден во битолскиот затвор право на глас имаа 48 затвореници кои се на единствениот избирачки список за претседателски избори и 74 затвореници на единствениот избирачки список за предвремените парламентарни избори. Во текот на вчерашниот ден ОИК-Битола овозможи гласање и на болните лица кои од здравствени причини не беа во можност да излезат на гласање во текот на денешниот ден.