Претседателот Иванов во посета на ИЗИИС
Претседателот на Република Македонија Ѓорге Иванов денеска го посети Институтот за земјотресно инженерство и инженерска сеизмологија по повод приемот на ИЗИИС во УНЕСКО, во пресрет на одбележувањето на 50 години од катастрофалниот земјотрес во Скопје.
- Науката се уште е неможна да предвиди кога ќе се случи земјотресот, но со сето она што го правите во ИЗИИС придонесувате градбите кои се создадени по вашите стандарди, да ги претрпат сите удари и да се спречат поголеми како катастрофи, но поважно човечки жртви, како што беше случајот пред 50 години, рече претседателот Иванов, додавајќи оти поука од тоа што се случи е дека на наредните генерации треба да им оставиме побезбеден и посигурен свет.
Основна тема на Самитот на лидери на Балканот, што ќе се одржи на 1 јуни во Охрид, информира Иванов, ќе биде за тоа како да се справиме со предизвиците кои ги носат природните катастрофи.
Директорот на ИЗИИС, Михаил Гаревски информира дека претседателот Иванов е патрон на интернационалната конференцијата што ќе се одржи од 29 до 31 мај по повод 50 години од скопскиот земјотрес, на која се очекува да учествуваат над 200 претставници од целиот свет.
- ИЗИИС стана институт на УНЕСКО категорија 2. Ние инсистиравме кратенката ИЗИИС да си остане покрај новиот назив интернационален институт по земјотресно инженерство, изјави Гаревски.
