Тодоров: Во 2003 се затвораа фабрики, денес се отвораат нови работни места- тоа ја прави разликата
Носителот на пратеничката листа на ВМРО-ДПМНЕ за Изборна единица 3 Никола Тодоров на вечерашниот митинг во Штип направи споредба помеѓу 2003-та година и денес. Истакна дека тогаш во Штип имало 10.617 невработени, а денес 5.200 од кои 2.497 се активни баратели.
-Има разлика во сите сфери. Во 2003 се затвораа фабрики и се отпуштаа работници, а денес се отвораат нови фабрики и нови работни места. Затворање наспроти отворање, тоа ја прави разликата, истакна Тодоров.
Тодоров им порача на штипјани да не веруваат во инстант политичари и да бараат гаранција.
-ВМРО-ДПМНЕ нуди гаранција, нуди програма со многу проекти. Тоа е цврста гаранција.
Потсети дека ќе биде изграден новиот автопат Скопје-Штип и додаде дека оваа година ќе започне да се гради и новата Клиничка болница во Штип.
Тодоров изрази надеж дека ВМРО-ДПМНЕ ќе има најмалку 14 пратеника од ИЕ 3 и вкупно 63 пратеника во Собранието.
-Верувам дека граѓаните на изборите наместо зборови ќе изберат дела, наместо арогантна насмевка ќе изберат човечност, бидејќи има разлика, додаде Тодоров.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
