Ставрески: Ќе помогнеме да се развие базната индустрија

Вицепремиерот и министер за финансии  Зоран Ставрески денеска ја посети текстилната фирма „Комфи Ангел“. Тој имаше можност да се запознае со процесот на производство на компанијата, чие речиси цело производство на постелнина е наменето за странскиот пазар.

- Задоволство ми е што сум во компанија која е една од најдобрите не само во Прилеп, туку и во Македонија, зашто со 900 вработени е еден од најголемите работодавци во земјава. Очигледно со добар менаџмент, каков што е во компанијата, Македонија има сила да произведе добар производ, но и да извезе на европските пробирливи пазари, рече Ставрески.

Според Ставрески и другите фабрики треба што повеќе да произведуваат сопствен производ, а не само лон-систем.

- Тоа создава поголема додатна вредност, а тоа значи поголем извоз, поголеми приходи за компанијата и за земјата, потенцира Ставрески. 

Прецизира дека за заголемување на извозот многу е битно да се користат економските промотори што државата ги има во светот.

- Економските промотори се важни за зголемување на извозот на македонските производи во повеќе земји. Очекуваме да се вклучи и менаџментот на „Комфи Ангел“ зашто нивното производство е претежно за извоз. Сето тоа дава простор за оптимизам и верувам дека „Комфи Ангел“ и прилепското стопанство имаат добри перспективи, рече министерот за финансии. 

Од средбата, рече Ставрески, произлегоа иницијативи за развој на базната индустрија, односно предилници и ткајачници за суровини кои ќе се користат во финалниот производ.

- Државата ќе даде свој придонес за развојот на базната индустрија во земјава, неопходна за обезбедување суровини за текстилните фирми. Се договоривме дека на ниво на фелата ќе има иницијатива да ги собереме сите слични компании и од нив да произлезе идејата како да ја доразвиеме базната индустрија. Ние како држава ќе бидеме партнер во која и да е фаза во делот на осмислување на концептот, како и во помошта преку фискални или други мерки, доколку е потребно да ја поттикнеме базната индустрија или да се креираат кредитни, финансиски продукти што ќе го поддржат тоа, рече Ставрески.

Косопственикот на текстилната компанија „Комфи Ангел“ Ирена Јакимоска ја поздрави иницијативата и подготвеноста на државата да помогне за развојот на базната индустрија, која, како што рече, е толку неопходна во процесот на производство.

Најави дека ќе се подготви акциски план и група која ќе работи на развојот на базната индустрија во Македонија.