Кандидатите за претседател на митинзи и средби со граѓани - еве каде ќе одат денеска

Кандидатите кои ја трчаат трката за претседател на државата, и денеска ќе одржат средби со граѓани и митинзи во градовите низ Македонија.

Ѓорѓе Иванов, претседателскиот кандидат на коалицијата „За подобра Македонија“ предводена од ВМРО-ДПМНЕ кој се бори за втор претседателски мандат по митинзите кои вчера ги одржа во Македонска Каменица, Делчево и Берово, денеска ќе одржи митинг во Македонски Брод и Кичево, а претходно и помал митинг во Пласница.

СДСМ, со кандидатот Стево Пендаровски кој вчера беше во Куманово, Кратово, Крива Паланка, Ранковце и Старо Нагоричани, денеска ќе одржи митинзи во Гази Баба и средби со граѓани во Илинден, Петровец и Зелениково.

Исто така и коалицијата ГРОМ со својот кандидат Зоран Поповски ќе одржи митинг во Охрид и средби со граѓани во Ресен, Дебарца и Струга. Поповски вчера одржа митинзи во Штип и средби со граѓани во Свети Николе и во Карбинци, како и посети на семејство во село Радање и на занаетчија во Штип.