Попоски: Бриселскиот договор ги релаксираше односите меѓу Србија и Македонија

Развојот на дијалогот меѓу Белград и Приштина, како и Бриселскиот договор влијаеја на релаксирање на односите меѓу Србија и Македонија, вели шефот на македонската дипломатија, Никола Попоски во изјава за српска „Политика“.

Тој за „Политика“ истакнува дека „само делумно се промениле“ двете отворени прашања меѓу Србија и Македонија - односите меѓу СПЦ и МПЦ, како и различните ставови во однос на Косово.

Попоски вели дека СПЦ и понатаму има потешкотии да ја признае МПЦ, и покрај тоа што, вели, веројатно сите би биле посреќни односите меѓу нив да се канонски признаени.

- Лично не мислам дека двете држави треба да се занимаваат со духовни теми. Секако, дека ниеден Македонец без оглед дали е верник, не гледа со одушевување кога таа институција се оспорува, бидејќи носи и идентитески карактер, вели министерот.

Тоа, додава тој, не ретко се интерпретира како дел од „пошироката негација на македонскиот идентитет, а во суштина би требало да биде прашање за самата црква“. 

- Не мислам дека проблемот е нерешлив, но исто така не сум убеден дека не можеме да живееме и без некое решение, оосбено ако би било штетно за пошироките македонски интереси, потенцира министерот Никола Попоски.