Украина: Се за избори, но поделени се за ЕУ

Мнозинството Украинци го поддржуваат барањето на  опозицијата за распишување предвремени избори, но бројот на поддржувачи и противници на договорот за асоцијација со ЕУ е речиси изедначен, покажува денеска објавено истражување на јавното мислење на агенцијата ТНС.

Според анкетата, по 51,3 отсто од испитаниците сакаат претседателот Виктор Јанукович да замине од функцијата и да се одржат нови претседателски избори, а 58 проценти од анкетираните се залагаат за предвремени парламентарни избори.

Мандатот на Јанукович (63), кој беше избран во 2010 година, му истекува во 2015 година, но демонстрантите во Киев и другите украински градови бараат негова оставка.

На прашањето кого сакаат да видат на премиерската функција, 21,8 отсто од анкетираните го посочиле тајкунот Петро Порошенко, кој е близок до опозицијата, додека 21,6 проценти се изјасниле за Сергеј Арбузов, кој му е лојален на Јанукович и во моментов е вршител на функцијата претседател на украинската Влада.

Донеодамнешниот украински премиер Микола Азаров поднесе оставка заедно со членовите на владата како отстапка кон опозицијата по двомесечните протести.

Анкетата покажува и дека Украинците во голема мера се поделени за прашањето на надворешната политика - 48 отсто од испитаниците сметаат дека Украина треба да ја преиспита одлуката на Јанукович за одбивање на партнерството со ЕУ, додека 40,3 проценти се со став дека таа не треба да се менува.

На прашањето дали протестите треба да продолжат, 48 отсто од испитаниците одговориле потврдно, а 45,1 проценти негативно.

Со анкетата биле опфатени 1.008 лица од урбаните средини.