Нетанјаху до Иранците: Иран ќе биде слободен

Израелскиот премиер Бенјамин Нетанјаху им порача на Иранците дека нема место на Блискиот Исток што е подалеку од дофатoт на Израел, два дена откако израелската војска го уби лидерот на либанската милитантна група Хезболах.

Говорејќи на англиски јазик во 3-минутното видео објавено од неговата канцеларија, Нетанјаху рече дека му се обраќа на иранскиот народ и ја обвини иранската влада за туркање на Блискиот Исток „подлабоко во војна“ по цена на сопствениот народ.

„Нема место на Блискиот Исток до кое Израел не може да стигне. Нема место каде што нема да одиме да го заштитиме нашиот народ и да ја заштитиме нашата земја“, рече Нетанјаху. Тој тврди дека иранскиот режим ги приближува Иранците „поблиску до бездната“. Иран и Израел ќе бидат во мир кога Иран „конечно ќе се ослободи“, што, како што рече, „ќе дојде многу побрзо отколку што мислат луѓето“.

Зборувајќи за Хасан Насрала, лидерот на Хезболах убиен во израелските воздушни напади врз Бејрут во саботата, Нетанјаху рече дека „марионетите“ на иранскиот режим се елиминираат секој ден. Израел ги засили нападите врз цели на Хезболах во Либан, најдобро вооружените милитантни групи поврзани со Иран низ Блискиот Исток.