Експерти: Малку е веројатно дека телата на жртвите ќе бидат извлечени од подморницата

Кога новинарите денеска ја прашаа американската крајбрежна стража какви се шансите да се извлечат телата на петмината мажи кои загинаа во експлозијата на подморницата Титан, им беше кажано дека „условите на морското дно се неверојатно тешки“. Би-би-си јавува дека експертите велат дека екстремната сила на експлозијата значи дека ќе биде речиси невозможно да се извлечат телата на загинатите.

На подморница притисокот е еквивалентен на тежината на Ајфеловата кула, вели Блер Торнтон, професор по морски науки.

„Структурата на подморницата е она што го штити екипажот од океанот. Сега замислете дека она што ве штити од огромна сила надвор ќе исчезне за миг“, додаде Торнтон.

„При таков удар на океанската вода, силата би била огромна. Тоа е како да фрлите 10.000 тони врз структурата“, рече професорот.

Дениз Корт, професорка по форензичка генетика, рече дека „ќе биде многу тешко да се стигне до таа област доволно брзо за да се извлечат телата“.

„Насилната експлозија на малата подморница значи дека има исклучително мали шанси телата на жртвите да бидат вратени на нивните семејства“, додаде таа.

Пет лица на исчезнатата подморница Титан загинаа во „катастрофална имплозија“, изјави  официјален претставник на крајбрежната стража, завршувајќи ја масовната потрага по бродот изгубен за време на неговото патување до Титаник.

Подводен робот без екипаж испратен од канадски брод ја открил урнатата подморница вчераутро на околу 488 метри од лакот на вековната урнатина, 2-1/2 милји (4 километри) под површината, изјави адмирал на американската крајбрежна стража Џон Маугер.