Левица излегува на протест пред ДИК

Левица, партијата која освои двајца пратеници во македонското Собрание излегува на протест пред Државната изборна комисија.

-Бараме одговорност од набљудувачите за време на изборниот процес, како и големите партии кои дозволија криминал врз Левица – ппартија која со над 40.000 гласови треба да добие уште најмалку тројца пратеници, се вели во објавата на Фејсбук.

Сепак од Левица велат дека тие не се креатори на настанот и оти воопшто не е планиран протест пред ДИК.

-Сакаме да ве известиме дека овој настан не е креиран од страна на нашата партија, ова е настан креиран од лажен профил. Го повикуваме нашето членство да го пријави/репортира истиот и истовремено ве известуваме дека, партијата во текот на утрешниот ден, ќе поднесе приговори до ДИК, поради извршените неправилности и украдените гласови за Левица, се вели во објавата на официјалната Фејсбук страна на Левица.

Претходно денеска претседателот на Левица, Димитар Апасиев на прес-конференција обвини за грабеж на изборите. Според него, на Левица и се „украдени“ 10.000 гласови. Рече дека промена на изборниот модел ќе биде првиот Закон кој тој ќе го поднесе во Собранието.