Глас за Македонија: Владата со молкот ги аминува велико бугарските соништа

На многумина конечно им станува јасно дека Република Бугарија, потпишаниот договор за добрососедство го замислува како капитулација пред великобугарските соништа, велат преку соопштение од партијата „Глас за Македонија“

„Глас за Македонија од почетокот ја предупредуваше јавноста дека и Преспанскиот и договорот со Република Бугарија не се крај, туку се само  вовед во непристојни уцени. Одејќи по тој пат, ќе го изгубиме и последниот атом на идентитет, јазик, култура и историја. 

 Одбивањето на претседателот на државата да го разреши советникот за надворешни работи  Денко Малески, јасно ни ја кажува позицијата на оваа Влада. Тој е пуштен само како пробен балон за да се напипа реакцијата на македонскиот народ, на “креативната“ реализација на потпишаниот договор.

Молкот на Владата за најновите уцени е неприфатлив. Бараме јасно и гласно да каже дали ќе прифати дека нема македонски јазик туку јазик на “Република Северна Македонија“, дека не постои наше малцинство во Република Бугарија, дека на Република Бугарија ќе и го даде ексклузивното право врз најсветлите личности од нашата историја?

Молчи и ЕУ. Европската Унија која дозволи и дозволува и натаму газење на основните човекови права и уцени на еден народ, никому не му е потребна. Ваквата ЕУ која ги крши сопствените конвенции и принципи, е одметната организација од слободната Европа чии идеали ги споделува македонскиот народ.

Глас за Македонија бара од Владата веднаш да ги отфрли неразумните барања на Република Бугарија и гласно да каже дека ова е сосема неприфатливо!“ стои во соопштението.