СДСМ: Преземаме конкретни мерки, заштитуваме 250.000 работни места

Заштита на здравјето на граѓаните и ублажување на ударот врз економијата се наши приоротети во овие тешки времиња, кога  се соочуваме со пандемијата со коронавирусот, велат од СДСМ.

-Преку конкретни мерки го штитиме здравјето на граѓаните, но и спроведуваме и низа мерки за ублажување на ударот врз економијата. Владата го усвои вториот голем економски пакет, вреден 200 милиони евра, што овозможува директна помош за сите кои се погодени од кризата – за работниците, за стопанството, за малите и средни претпријатија, за дуќаните, занаетчиите, за спортистите и уметниците и за сите граѓани кои се дел од неформалната економија. Со овие мерки, во овие тешки времиња, ќе сочуваме најмалку 250.000 работни места и ќе им помогнеме на над 35.000 компании полесно да ја пребродат оваа здравствена и економска криза, се вели во соопштението.

Според СДСМ, преземени се суштински и ефикасни мерки за грижа за сите за граѓани.

-Ги кратиме сите непродуктивни трошоци, а во духот на солидарноста сите функционери на државно и на локално ниво во наредните два месеца ќе примаат минимална нето плата од 14.500 денари. Претседателите и членовите на управни и надзорни одбори на јавни институции, како и претседателите и членовите на Советите во општините, а кои се вработени, нема да примаат надомест за времетраење на кризата. Во изминатите две и пол години, многу пати покажавме и докажавме дека знаеме и можеме да се справиме со сериозни предизвици, да носиме храбри одлуки за подобра иднина, за остварување на децениските цели-  членство во НАТО и отпочнување на преговори за членство со Европската унија, со што обезбедивме просперитетна иднина за граѓаните и државата! Тоа ќе го докажеме и сега. Заедно, сплотени, со конкретни мерки ќе се справиме и со оваа тешка здравствена и економска криза, се вели во соопштението од СДСМ.