ВМРО-ДПМНЕ: Шилегов лаже, СДСМ го уништуваат зеленилото и сечат дрва

Петре Шилегов по примерот на Зоран Заев свесно лаже и ги манипулира скопјани. Градоначалниците на СДСМ сечат дрва низ цело Скопје, а Шилегов игра на картата на кратка меморија на граѓаните кога вели дека не сечеле дрва. Ова денеска го велат од ВМРО-ДПМНЕ како реакција на изјавите на Шилегов, при садењето јапонски цреши.

- Доколку сепак Шилегов има дупка во меморијата, па не се сеќава што правеа Златко Марин и Стефан Богоев пред неколку месеци, ние ќе го потсетиме со фото и видео материјал како се сечеа дрва за да се градат згради, токму од него и неговите градоначалници. Богоев сечеше дрва кај Веро во Карпош, а Марин сечеше дрва низ цел Аеродром. Ова е вистинската слика на СДСМ. Уништуваат зеленило и ја загрозуваат животната средина, а потоа лажат. Лагите и манипулациите нема да им помогнат на СДСМ. Скопјани одамна ги прочитаа. За уништувањето на зеленилото, загрозувањето на животната средина и неработата во изминативе две години следува казна на 12 април, кога СДСМ ќе изгуби во Скопје, велат тие.