Невремето направи хаос во гевгелиско - штетите големи
Невремето проследено со град вчера во попладневните часови предизвика големи штети на земјоделските посеви во селата Негорци, Ново Конско и делови од Мрзенци, Смоквица и Милетково, соопштија денеска од Општинската комисија за проценка на штети.
Најголеми се оштетувањата на земјоделските култури и лозјата на кои бербата само што почна, а според првичните неофицијални проценки во делови на Негорци тие се целосно уништени, а некаде оштетувањата изнесуваат од 50 до 75 отсто.
Градоначалникот на Гевгелија, Сашо Поцков денеска ги обиколи оштетените посеви и ги информираше земјоделците дека општината веќе ги презеде потребните активности за што побрза проценка на штетите.
Општинската комисија веќе се наоѓа на терен за да ги утврдува настанатите штети и ги информира земјоделците дека пријавувањето на штетите ќе се врши до петок во општинските канцеларии во Гевгелија, Негорци и Миравци.
Врз основа на поднесените пријави од оштетените земјоделци, Комисијата од утре ќе почне со индивидуалната проценка на штетите од невремето.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа