Полицајци лажно пријавиле дека биле нападнати од мигрант

Одделот за внатрешна контрола, криминалистички истраги и професионални стандарди поднесе кривична пријава против 34- годишниот Б.М и 38- годишниот Б.Д полициски службеници во Прифатен центар за странци при СВР Скопје, поради постоење основи на сомнение за сторено кривично дело лажно пријавување на кривично дело.

Пријавените на 4 август пријавиле дека биле нападнати од задржаниот К.Н. од Авганистан.

„По извршените проверки, како и увидот во системот за видео надзор во прифатниот центар за странци, било утврдено дека во дежурната просторија немало физички контакт помеѓу полициските службеници и К.Н., што е спротивно на нивната пријава за кривично дело напад на службено лице при вршење на работи на безбедноста“, соопштија од полицијата.