Детето кое падна од зграда се бори за живот - КАРИЛ со детали за несреќата
Дванаесетгодишното момче, кое синоќа околу 22 часот падна од третиот кат од станбена зграда во Штип е во животна опасност.
Од КАРИЛ во Скопје информираат дека е извршена хируршка интервенција на главата и на повредите што ги здобило момчето при падот.
Според соседите, станува збор за несреќен случај, односно детето не видело дека е отворена вратата на балконот која нема никаква заштитна ограда и занесено во менување канали со далечинскиот управувач на телевизорот, паднало.
Директорот на Клиничката болница во Штип, Ален Георгиев изјави дека детето кај нив било примено со тешки телесни повреди поради што е препратено во Скопје.
- Најдени се повеќекратни тешки телесни повреди, скршеници на главата, на ребрата и на ногата и во една тешка животнозагрозувачка состојба е пратен на Клиниката за анестезија, реанимација и интензивно лекување во Скопје, истакна Георгиев.
По несреќниот случај синоќа на улицата „Енгелсова“ во Штип извршен е увид на лице место со цел да се утврдат причините за падот на момчето.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
