Полицијата во Еквадор заплени три тони кокаин

 

 

Во специјална операција во пристаништето Гвајакил, полицијата на Еквадор заплени над три тони кокаин, соопшти еквадорското МВР.

Полицијата претресла три контејнери со конзерви со егзотично овошје и зеленчук, наменет за Алжир и Шпанија. Пронајдени биле околу 300 пакети со кокаин.

- Во Гвајакил запленети се 3,2 тони кокаин, подоцна ќе изнесеме информации за приведените, напиша на својот профил на Твитер министерот за внатрешни работи Хосе Серано.

Службеници на Националната управа за борба против наркотици спроведуваат дополнителна истрага во Гвајакил и Кито, за да ги пронајдат одговорните за превоз на кокаинот. 

Од јануари годинава досега во Еквадор се запленети 24 тони наркотици, вклучително кокаин, наменет за транспорт во САД и Европа. 

најчитано сега