Универзитетот „Гоце Делчев“ од Штип донираше 25 тони вода за поплавените во скопско – тетовскиот регион
Утрово штипскиот Универзитет Гоце Делчев донира 25 тони флаширана вода за пиење за унесреќените во скопско – тетовскиот регион, информира ректорот Блажо Боев.
Воедно, Боев апелира и до останатите институции и поединци активно да се вклучат во акцијата за помош на настраданите граѓани од погодените подрачја во Скопје и Тетово од последното невреме.
– Како израз на нашата определба за солидарност кон граѓаните на скопскиот и тетовски регион кои ја доживеаја оваа природна непогода, Универзитетот Гоце Делчев, согласно своите можности, донира 25 илјади литри флаширана вода за пиење. Пратката е испорачана во Црвениот Крст во Скопје. Искрено се надевам дека и ова е добар пример за останатите институции и поединци активно да се вклучат во помагање на настраданите од невремето во погодените региони на Скопје и Тетово, изјави Ректорот на УГД, професор доктор Блажо Боев.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
