Хуманитарна помош од Бугарија за мигрантите кај Табановце

Два камиона со хуманитарна помош изутринава од Софија се упатени за бегалците и мигрантите во транзитниот центар Табановце, крај Куманово, во Република Македонија, објавено е на веб-страницата на Владата на Бугарија.

Донацијата е на иницијатива на бугарскиот премиер Бојко Борисов, а се прави во соработка со бугарскиот Црвен крст и бугарски компании кои доброволно обезбедиле прехранбени продукти и минерална вода.

– Испраќањето на оваа хуманитарна помош е израз на солидарноста на премиерот Борисов и на бугарската држава кон немоќните луѓе, изјави началникот на политичкиот кабинет на премиерот Анжелина Тотева која ја координира донацијата и учествува во нејзиното доставување.

Таа посочи дека Владата внимателно ја следи состојбата во соседната земја и во случај на неопходност Софија ќе продолжи да помага според можностите. Тотева додаде дека донацијата е договорена во телефонски разговор на премиерот Борисов со македонскиот претседател Ѓорге Иванов изминатата недела кога беа договорени и заеднички мерки за зголемување на контролата бугарско-македонската страница и пресекување на нелегални канали за преминување на мигранти.

Ова е трет конвој хуманитарна помош што се организира на иницијатива на Владата на Бугарија. Првиот беше упатен во Унгарија, а вториот во Грција. Во транзитниот центар во Табановце во моментов се блокирани околу 1.500 мажи, жени и деца.